Nyerat
dening
Risywan Taufiq
Kala wengi srengenge pati
Angen-angen pujangga tansah ngulandara
Madosi tembung tembung gegurit blaka
Gatra sagatra
Pada sapada
Gurit sagurit
Trenyuh ati nyerat kasengsaran urip kang
pait
Tansah kesensem nyawang kauripan ayem
Duh gusti
Kula
pujangga nom
Mung birawa nyerat gurit rung pada
Sapada dados panglipur
Sapada dados parlambangipun atur
Mugi mari lair batinku
Aja Aku
dening : Safila Oktaviani
Aja dipaksa!
Aku durung bisa
Aku isih kuciwa
Aja meneh tresna awakmu
Wong aku wae
Durung bisa tresna awakku dhewe
Aja...
Aja padakna aku karo wong liya
Aja...
Aja karo aku
Ora..
Ora merga aku mati rasa
Nanging...
Atiku iki wis remuk
Menawa aku ora nastiti milih
Atiku bakal ambyar luwih-luwih?
Diwesiyasat Kapang
dening: Katarina Aprilia
Samun ing wayah ratri
Nyendhal ati kang nandhang wuyung,
karana sliramu tan bisa kajangkah laku,
Kapang iki,
tan bisa kaucap ing ujar
Kagawa ngimpi saben mereme netra,
rumasuk ing raga bareng sumilire angin wengi
Apa kowe krasa?
Ora...
pangrasaku, iki amung aku sing krasa
Mendhem banjur kependhem jero
Lintang ing awang-awang
Tak titipake rasa kapang iki
kanggo slirane kang tan bisa tak sanding
Muga bisa ngreksa rasa lan ngreksa tresna
ing kana.
Tema geguritan : Satire
Laku Tresna
Dening : Endang Winasih
Tresna dadi bab sepele
Namung dadi lamise lambe
Kang ora padha kaya kasunyatane
Ninggalake tatu akih cacahe
Lara lapa bebarengan dirasa
Tekane ngumbar nafsu marang liya
Lamun wis mangkana
Jarene banjur marem ing sukma
Urip kuwi pancen rekasa
Apa maneh babagan tresna
Kebak coba lan panggodha
Nasib dadi karanta-ranta
Yeng yeng ora gayeng
Ndeng ndeng dadi gendheng
Bit bit mobat-mabit
Kaya wit pring keterak angin jurit
Kahanan kang nyawiji
Dumadi saka nafsune hapsara hapsari
Ati-ati marang laku utami
Tresna ya tresna nanging aja mblenjani
Kancaku
Dening : Anita Istiana
Kancaku....
Pie kabarmu?
Kok saiki mlepuk yen ketemu
Nek endi tangan sing biasane genggem tanganku
Nek endi pundak sing biasane kanggo nangisku
Nek endi kuping sing biasane krungu ceritaku
Kancaku...
Apa wis lali karo aku?
Aku iki kancamu dudu sainganmu
Aku pengen berbarengan maneh karo awakmu
Berbarengan lan sesandhingan karo guya guyu
Sinambi njagong lan ngombe es kopi susu
Kancaku...
Kapan kene bisa ketemu?
Aku kangen guyumu sing gawe tentrem atiku
Aku kangen suaramu sing mbudeki kupingku
Ayo dolan ngalor ngidul maneh bareng aku
Aku
Dening: Messi Nurzanah
Aku iki sapa
jagad wis padhang ko ya ora ngerti
ndeleng sesuk ora nyemaur, ndeleng wengi
bali kedher
duhh Gusti, apa sejatine kelairanku iki
namung dadi reruntahe pratiwi
Wiwite jaman wis ora kepetung
ngetung jagad tambah menthung
mikir molak-malik ora ana pangundang
mung nyemauri kidung kang ngumandhang
duh Gusti aku iki sapa?
Nanging nalikane swara asih wis ngukir ing
pitakonan
wis wancine aku kudu percaya marang asih-Mu
wis wancine aku kudu pasrah marang
panguwasa-Mu
aku percaya kelairanku iki wis dadi janji-Mu
marang pratiwi
Waspa
Dening: Winarsih
Sumunar cahya kuning ing sisih kulon
Kang nate dadi pepujanku
Sesawangan ing pucuking wengi
Kang mung sakedheping netra
Muspra...
Pangrasa kang wus keladuk
Awujud pepindhan ing reroncen carita
Kang ora ana paedahe maneh
Sumeleh...
Wus rampung kadupak mendhung
Cekap anggone dadi pangripta carita
sandiwara tanpa swara kang gawe lelara
Tumetesing waspa,
Apa merga udan nggrejih sore iki?
Apa merga petenge langit wengi iki?
Apa merga pangrasa ing sajroning manah iki?
Waspa iki,
Mili nut iline reroncening carita
Sineksenan langit tanpa lintang rembulan
Sawetara, jarna dadi irah-irahan guritku
