Tresna Waranggana
Dening : Aulia Rizki Rahmaulidayani
Aku Vera Ayu
Puspita, kanca-kanca musisi, penyanyi, lan seniman ning daerahku ngundang aku
Vera Veronika. Ya, aku iki penyanyi. Saiki umurku 23 taun, nanging aku isih wae
wong pada ngenak aku iku Vera Veronika. aku nyanyi wiwit kelas 1 SMP. Susah
seneng tak lakoni udan panas tak trabas. Kanggo awakku nyanyi kui wis kaya
tememplek karo raga. Cara basa Indonesiane ki ya mendarah daging, kaya-kaya wis
ora bisa dipisahake.
Bengi iki, aku
karo Mas Aby lagi jagongan ing ngarep umah, dhasare hawane sumuk. Dadi aku
ngisis ing latar sinambi jagongan karo Mas Aby. Sak nalika aku kelingan nalika
aku lan Mas Aby isih pacaran.
Minggu esuk jam
10 aku budhal menyang desa sebelah, saperlu ngayahi panyuwune tuan rumah kang
duwe gawe. Teka papan panggonan aku disuguhi kaya tamu. Banjur langsung munggah
ing ndhuwur panggung.
"Mbak,
kancaku ameh nusul rene. Ngko ben melu munggah panggung karo aku ya, Mbak"
Kandhane Mas Ipa, supir anyarku.
"Kancamu
sapa ta, Mas?"
"Wonge
Fotografer mbak, tak akon e gawa kamera gawe moto sampeyan."
"Wo.... Ya
masuk kui, Mas. Jarang-jarang aku duwe potograper pribadhi" Semaurku
kanthi semangat.
Aku wis entuk
sak lagu, kancane Mas Ipa lagi teka. Dheweke banjur nyalimi aku. Aku langsung
mak tratap, piyayine bagus, gagah, kulite kuning langsat, pipine dekik nambah
manise eseme. Atiku deg-degan banter kaya-kaya nyaingi suara deasel sebelah
panggung. Apa kaya ngene ta sing jenenge cinta pada pandangan pertama. Ya kui
Mas Aby, sing saiki dadi bojoku.
Sawise salaman
banjur padha sibuk dhewe-dhewe. Aku nyanyi Mas Aby moto-moto aku lan
pisan-pisan moto artis liyane.
"Bro, iki
ngko potone kirimno aku wae ya. Aja ganggu Mbak Vera. Wonge sibuk." Kandhane
Mas Ipa marang mas Aby sarampunge acara.
"Ya, Bro.
Ya wis aku pamit sik. Mengko tak kirimke awakmu nek wis tekan ngomah"
Jawabe sinambi nyalami Mas Ipa karo aku.
Wis ana sesasi
anggonku ngangen-angen Mas Aby. Yen kelingan eseme gawe aku mesam-mesem dhewe
banjur ora bisa turu, blabas tekan subuh.
"Mbak, Mbak
Vera... Mbak!!" Pupuku di keplak Mas Ipa.
"Aduh!!!
Napa ta, Mas. Loro e, pedes pupuku."
"Kae lho
sampenya di undang MC ne, jatahe sampean nyanyi"
"Astaghfirullah,
sorry-sorry ora krungu aku. Yawis tak nyanyi sik." Kandhaku sinambi
ngadek.
"Jane
sampean ki ngapa ta mbak? Tak sawang-sawang wiwit mau mung ndomblong,
klecam-klecem raine abang koyo kepiting rebus. Isih esuk kok di celuki MC wis
ora fokus."
*Kluntingggg....!
Durung semaur
hapeku muni, ana notifikasi pesan saka Instagram. Tak buka isine fotoku.
"Iki akune
sapa ta, Mas?" Takonku marang Mas Ipa.
"Woh, iku
Aby, Mbak. Ngapa ta bocahe, wis tak kandhani aja ganggu sampean kok."
"Iki ngirim
fotoku, Mas. Tapi kok ngene rupaku."
"Walalalah,
kok elek ngono rupane sampeyan Mbak"
*Plakkkkkk! Mas
Ipa tak keplak gegere. Dheweke pringisan.
***
Wiwit saka pesan
iku aku karo mas Aby dadi sering komunikasi, banjur dadi kulina akhire pacaran.
"Dek, Mas
arep lanjut S2 ning Semarang."
"Lho Bagus
mas, malah seneng aku awake dhewe padha kuliah Semarang." Jawabku seneng
amarga wektu kui aku ugo lagi kuliah S1 ing Semarang.
"Nanging
Mas meh ngekos, Dek. La awak mu iki daring ning omah, terus jobmu lagi rame,
nek di tinggal ya piye, ora isoh kan? Jogja-Semarang adoh, Dek"
"Ya pancen
bener ngendikane Mas Aby. Terus masalahe napa, Mas? Adek mboten napa-napa kok
ditinggal Mas Aby teng Semarang. La pripun meleh kahanane ngeten. Job e nggih
eman-eman yen ditinggal. Kuliah e Mas napa nggih mboten daring? Mboten saget
teng mriki?"
"Mas mboten
saget LDR, Mas mboten kuat, Dek. Nanging mas nggih pengen fokus kuliahe, pengen
sukses. Merga tuntutane Bapak, Mas stress Dek yen kuliah ning omah."
"Mas, Adek
janji adek support mas terus saking mriki, adek janji sering telpon lan
kabar-kabaran kaleh, Mas. Awake dhewe nggih saget ketemuan saben minggu. Nggih?
Adek yakin, Adek percaya kaleh mas Aby. Mas mesthi saget jaga hubungan
niki."
"Nanging,
Dek...."
"Vera
percaya mas Aby saget. Semangat!!!" kandhaku sinambi nyawang raine mas aby
lan nggenggem tangane.
***
"Mas, sesuk
dolan Semarang ya. Ning kos e mas Aby. Mumpung prei iki." Ajakkku marang
mas Ipa. Merga dhasare wis janji yen arep ketemu saben minggu. Nanging wis arep
sesasi aku durung ketemu maneh merga job ku padet. Mulane sak iki aku menyang
kos-kosan e mas Aby langsung. Biasane mung ketemuan ning tempat wisata utawa
kafe sisan refreshing.
Aku menyang
esuk-esuk karo Mas Ipa. Sepanjang perjalanan aku turu, awakku rasane kesel.
Balunganku rasane kaya diremuk-remuk.
*Brukkkkk!!!
"Wah wis
ajur... ajur...."
"Ana apa,
Mas Ipa?" Aku tangi merga kaget
"Kae mbak e
metu saka gang ora delok-delok mbak. Kedudul mobile awake dhewe." Aku lan
Mas Ipa langsung metu mobil.
"Mbak
pripun nyebrang ora delok-delok. Untunge mung kedudul. Untunge aku pas
alon-alon. Yen banter mau dadi kepiye mbak...mbak..." Mas Ipa malah
muring-muring dhewe.
"Wah mas,
piye ta malah muring-muring. Iki ditulungi disik mbak e. Ayo mbak mlebu mobil
disik tak obati iku tangane karo dengkule lecet. Mas Ipa motore mbak e
pinggirna disik! Aja grundelan wae!" Kandhaku sinambi nuntun mbak e mlebu
mobil.
Batin atiku
kandha yen kaya tau weruh mbak e iki tapi lali ning ngendi. Ning njero mobil
mbak e mung nangis sesegan. Aku bingung, padahal lukane mung lecet. Sawise tak
obati mbak e banjur pamit lan njaluk ngapura.
"Mbak Vera,
Mbak e ora asing ya, kaya penyanyi sing winginane sepanggung karo
sampean." Kandhane Mas Ipa.
"Owalah iya
mas, kayane memang bocah kui. Sing mbok lirik i terus kae ta merga jaremu
manis. Isih bocah kae mas. Ya kuliah ning Semarang jarene, isih semester
loro."
"Wah yo
isih kinyis-kinyis, mantab iki mbak. Jodohno karo aku."
Kupingku
sanalika gatel ngrungokake panjaluke mas Ipa. Dhasare wonge rodok cluthak yen
weruh gadhis.
"Yawis ayo
lanjut, mas!"
Durung nganti
ucul kopling teka-teka ana motor maneh liwat tanpa unggah-ungguh. Mas Ipa
sanalika kaget.
"Wooo la
diamput! Randue adat! Apa wong kene ora pada bisa numpak montor ta!"
"Sabar,
Mas. Sabar....! Aja misuh-misuh." Kandha ku.
"Lho sik
sik sik... Kae Aby e Mbak Vera. Ngapa wonge numpak montor bedigasan ngono
iku."
"Wah iya
mas, nganti ora ngematke mobilku ki. Jajali di tut i mas. Ayo cepet selak
ketinggalan!"
Mobil banjur
puter walik ngetuti mas Aby. Dheweke numpak motor banteran kae koyo di oyak
depkolektor. Tak buntuti kok nganti teka Tembalang banjur ngilang ning cedak
kampus.
"Lho Mbak
ilang ning ngendi bocahe. Ngapa sih tekan kene. Wong kampuse ning Sekaran kok
ya."
"Iya lho
napa ya, Mas Aby teka kene. Alon-alon wae, Mas. Ndak keliwatan."
"Iya,
Mbak"
Rodok sue
anggonku ngubengi kampus sinambi clingak-clinguk. Hapene ora bisa dihubungi,
pikiranku wis macem-macem merga mas Aby ketok panik.
"Mbak...Mbak!
Kae motore Aby. Tapi ora ketok wonge."
"Iya kae,
Mas. Mandeg! Tak medun ning kene. Goleka parkiran."
Aku langsung
medun, nggoleki mas Aby. Rodok sak untara aku mandek sedela merga ngerti montor
e mbak e sing mau kedudul mobilku, aku ngerti merga apal nomer plate. Embuh ana
apa kok perasaanku ora kepenak. Aku mbacutake mlaku ku, entuk rong langkah aku
wis mandeg maneh, saiki aku malah weruh pemandangan sing sadurunge ora tau tak
bayangke. Aku dewe weruh wong sing paling tak tresnani ngelus-elus lan ngekep
awak e wong wedok liya sak liyane aku. Saknalika atiku rasane remuk, panas ora
karuan. Nanging aku isih nekat nyedak, awakku lemes. Niatku teka kene arep
ngagetke dheweke, malah aku sing dikageti dhisik. Tak undang Mas Aby, suaraku
serak, kaya-kaya wis ora metu suarane.
"Mas....!
Mas Aby..."
Sing diundang
mripate mecicil, langsung mlayoni aku.
*Buggggg!!!
Saka mburiku Mas
Ipa mlayu banjur njotos Mas Aby. Sing wedok njerit, aku mung ndlosor ning
lemah, eluhku dleweran.
"Ra ndue
adab koe, Le!" Mas Ipa bengok-bengok. Aku banjur menyat lan mlebu mobil.
Mas Aby diseret Mas Ipa saperlu njaluk ngapura karo aku. Nanging aku wis wegah
weruh raine.
"Ayo muleh,
Mas." Panjalukku karo Mas Ipa.
Tak tinggalke
mas Aby ning kono karo wedoke. Ing perjalanan muleh aku meneng, Mas Ipa uga.
Mung suara mesin lan kendaraan pada nyalip.
***
"Assalamualaikum,
Pak... Buk..! Dek Vera wonten?"
"Ndhukkk!!!
Kae pacarmu teka! Ndang metu, ora ngamar wae." Dhawuhe Bapak.
Ora kepingin
wong tua kepikiran aku saknalika metu. Amarga bapak ibu ora ngerti yen aku karo
mas Aby lagi ana masalah.
"Kula badhe
ngajak, Dek Vera medal sekedap, Pak"
"Iya kana
ndang mangkat, wis bar maghrib iki. Aja wengi-wengi baline ya, Le!"
Dhawuhe Bapak.
"Nggih pak,
Maturnuwun."
***
"Dek, Mas
nyuwun ngapura mpun nglarani. Mas ngoten merga butuh kanca, Dik. Mas butuh
disemangati, butuh disupport. Sedangkan adek mpun sesasi niki sibuk terus.
Diajak telpon alesane kesel. Diajak ketemuan alesane kesel. Mas ngrasa Adek
mpun bedo. Mboten kaya mbiyen meleh. Adek mpun jarang perhatian kaleh, Mas.
Padahal mas lagi butuh adek banget. Bebarengan niku mantane mas nggih teng
Semarang. Mas ngrasa mung dheweke sing enten ngge mas, Dek. Mas nyuwun
ngapunten saestu." Mas Aby jelasake.
Krungu
katerangane atiku dadi ngrasa salah marang Mas Aby.
"Mas mboten
pengen awake dhewe bubaran, Dek. Mas pengen lanjut nanging mas pengin Adek dadi
wong wedok sing kaya kekarepane mas. Ampun sak penake dhewe, Dek. Mas nggih
pengen dihargai."
Sakjeroning
atiku tresna tenan marang, Mas Aby. Nanging ya isih lara ati merga
diselingkuhi.
Nganti sak iki
rasa lara kui isih mbekas, yen ngerti jenenge sing wedok mesthi langsung panas
ati.
***
"Dek,
nglamunke napa ta! Aku ngomong wiwit mau ora dirungokake ta jebule."
Kandhane mas Aby mbuyarake lamunanku.
"Kelingan
critane awake dhewe biyen, Mas. Teka sakiki aku teseh mboten ngira yen bakal
dadi tekan semene." Jawabku.
"Hmmmm, di
eling-eling wae mengko ngerti-ngerti nesu."
"Sak niki
mpun mboten, Mas. Alhamdulillah mergo mpun mboten nyanyi aku dadi mboten ketemu
wedokan kae. Krungu jenenge mawon mpun ndamel lara ati. Mas ampun nganti ngoten
meleh nggih. Masio awake dhewe wis bebojoan nanging bebojoan niku sanes akhir.
Mesthi teng ngarep mriko godaane luih gedhe. Adek nggih janji, bakal dadi wong
wedok kang luih apik meleh kagem Mas Aby."
"Maturnuwun,
Dek. Sakiki weruh awakmu wis gelem berjilbab mas wis seneng. Wis ora klambenan
klambi sing kurang bahan maneh."
"Nggih,
Mas." Aku rodok mrengut.
"Mas wong
wedok e iku to wektu kae ki kedudul mobilku, tak obati merga lecet tangane karo
dengkule."
"Wah untung
wektu kui awakmu urung ngerti ya, Dek. Yen ngerti mesthi mbok plindhes sisan.
Hahahaha!!"
Wong loro banjur
cekekekan bareng.
