(Cerkak dening: Kurniawan)

           “Kim! Tangi Kim! Selak imsak,” mangkono swara sing tansah bengak-bengok ngebakki kupingku, ya ora liya, swarane emakku saka pawon, gugah bocah sing turune angler kaya kebo. Mesthine wae ora bakal tangi, yen durung ana pecut sing nyampluk awakke.

            “Ndang tangi! Raup! Ndang saur kene, bocah digugah angele rakaruan” Mata sing esih ngantuk, riyip-riyip, takpeksa awakku iki supaya tangi, karo molet-molet nyawang jam sing tememplek nang pager kamarku, wis nuduhke jam setengah papat esuk. Tanpa semaur, aku budhal nang buri, mesthi nguyuh, ora lali ya raup sisan, supayane nyawaku genep.

            Merga esuke ya ethok-ethok melu nindhakake pasa, dadi ya kudu melu saur. Sanajan sok kadhang budhal nyang warung sing ketutup korden.  Sega, lawuh, wedang, kabeh wis cumepak. Kari njupuk, banjur enggal-enggal dipangan. Lagi wae ngemplok sega telung cendhok, dumadakan hapeku muni, ohhh.. jebul ana telepon saka Nisa, wong wadon sing ws suwi dadi gegantilaning atiku.

            Aku lan Nisa kenal wis suwi, wiwit kelas telu MTs, nalika nang pondhok pesantren Kyai Ageng Giri jaman semono. Nisa iku asline wong Kudus, ya tangga  kuthaku dhewe. Dheweke wis ra nduwe ibu, merga meninggal nalikane nglairake Nisa. Merga kuwi bapakne dadi ora seneng marang dheweke, nganggep yen Nisa kuwi bocah kurang ajar, lagi lair wae wis gawe tumekaninng pati dening ibune. Mangka wiwit iku, Nisa dirumat dening simbahe. Sanajan wis sepuh, nanging esih ngrumat bayi sing ditinggal seda ibune. Aku lan dheweke bebarengan wis suwi, wong tuwaku ya ngerti, seneng pisan. Tangga teparo ya wis adha ngerti uga. Dheweke asring ngabari aku lewat telepon.

             “Hallo, mlekum.. Aku wis tangi, Dhik. Awakmu telat nuk,  anggone gugah aku. Hahaha..” Karang biasane Nisa ya nelpon aku nalikane wayah-wayah saur ngene.

            “Waalaikumsalam, Mas..” swarane karo sajak mesesegen.

            “Lohh, kena ngapa, kog sajake sedhih mangkono? Halah-halah! aja nangis ta,  mung telat anggone gugah aku kog nangis!”

            “Dudu prekara kuwi Mas..”

            “Lha apa ta Dhik? Sajak wigatine ki lhooo..” aku pancen ora ngerti karepe Nisa iku ngapa, kog esuk-esuk durung subuh wae wis tetangisan. Wong saben dinane wiwit karo aku, dheweke ya ora tau sedhih. Malah kepara bungah-bungah wae.

            “Sewengi aku rabisa turu Mas..” ya esih wae, kandha karo nangis.

            “lhah dalaaaaahh.. amung prekara rabisa turu wae dadak nangis, huuuu.. wagune ki lho” Wiss.. bubar saur mengko subuhan terus turu pollll.. sore ya! Pancen semaurku ceplas-ceplos mangkono, kaya adat saben dinane. Nanging arepa kaya ngapa Nisa ora tau serik, pancen, dheweke iku kenya sing sabar, alus, tur ya ayu. Krana iku, akih sing pengin nggarwa dheweke.

            “Dudu Mas, dudu kuwi..  mau bubar trawih, Huda sowan rene sakulawargane..”

            “Hayo mbok ben wae ngapa ta? Dolan kog ora olih. Wong ya arep silaturahmi marang simbah..” Huda iku kakang kelasku, nalika nang pondhok pesantren  biyen, dene wong tuwane pancen ya wis kenal suwi karo simbahe Nisa, malah wis kaya sedulur dhewe. Dadi, lumrah wae yen Huda sakulawarga iku sowan nang simbahe Nisa.

            “Huda nglamar aku, Mas!..  mulane dheweke iku ngajak sakulawargane.”

            “Hehh, nek ngomong aja ngawur ngono.. goroh! Ra lucu lahh! Mengko yen dilamar temenan kapok lho ya.. hahaha, benera Huda kuwi bagus, ya rada pinter, nanging apa kowe ki gelem?”

            “Aku gak goroh Mas, estu, Demi Allah..”

            “Ya nek pancen kowe seneng tampanen, hahaha..” niyatku pancen guyoni Nisa, supayane dheweke ora nangis wae. Aku wani nyeplos mangkono merga Mbahe Nisa wis kenal aku suwi, kepara malah aku dianggep anake dhewe, dianggep tunggale Nisa. Luwih-luwih wis dijanjeni, dene sesuk wis siap rabi aku kon nikah karo Nisa.

            “Ora Mas, ora. Ra ana wong lanang liya saliyane sampean, nang atiku iki, arepa nganti tumekaning pati, rasa iki suci, tulus, hamung gawe sampean. Disekseni arwah ibuku sing ana kana,  hamung sampean Mas!” swarane Nisa malah sansaya ora negelke, sansaya mesesegen anggone nangis.

            “Arepa Huda nglamar awakmu, nanging simbah kan wis menehi janji marang aku ta Dhik, dene aku sing bakal karo awakmu.”

            “Ora ngertiya, Mas.. ora tak nyana, simbah malah nampa lamarane Huda marang aku.”

            Saknalika swaraku kandheg, kaya dene ngerem ndadak. Ora ngira, ora tak nyana, yen simbahe Nisa tegel  marang wong sing dianggep anake dhewe, wong sing dijanjeni bakal dijodhohke marang putune. Telepon sih nyambung marang Nisa, nanging aku wis ora kuwat semaur, dhadhaku sesek, pungkasane eluhku sing tumetes nyauri swarane Nisa sing omong lewat telepon.

            Adan subuh  wis keprungu, nganti komat pisan, nanging  aku ora bisa ngerem anggone ngendheg eluh sing tumetes.

            “Kim! Subuhan! Aja malah ngalamun wae,” swarane emakku karo nyedhaki. “kowe ki ngapa? Subuh-subuh kog nangis, kenthirmu lho, Lee.. wis kana ndang subuhan sik!”

            “Iya Mak, iyaa.. aku wis krungu. Rausah dibulan-bleni ngono.. dadekake aku tambah mumet.”

            “Mumet ki mumet ngapa lahh?! Wong ya prei suwi, gaweyane amung tura-turu kaya gombal amoh kog ya bisa mumet.”

            “Iya Mak,  sakarepmu lahh..” karo mlaku menyang buri kaya dene manungsa sing wis ora duwe daya.

            Aku ora wani crita marang emakku, ngenai Nisa sing dilamar Huda, malah ditampa mbahe pisan. Amarga emakku ya ngerti yen aku wis suwi karo dheweke, luwih-luwih emak ya setuju banget, amarga kelakuane sing apik,  wonge ya apik uga.

            Mengko yen wis padhang takniyati, aku arep sowan menyang mbahe Nisa, konfirmasi kena ngapa panjenengane tega banget marang aku. Padhahal ya wis janjeni, bakal menehake si Nisa supayane mbesuk yen aku lulus bisa langsung tak lamar. Saben aku sowan ngomahe, mbahe ya katon bungah banget, sajak ndhukung aku temenanan, nang ngarepanku pancen mangkono, tapi aku rangerti kepiye karepe saiki. Ana unen-unen, kedhung jero bisa dijajakki, nannging atine manungsa, sapa sing ngerti?

            Padhang jingglang, srengenge sumorot saka wetan, peksi-peksi tansah padha cecaturan, angin sumilir alon kang gawe swasana adem tenan. Nanging atiku esih padha wae, kebak rasa pitakonan. Sawise adus lan tata-tata, mangka aku enggal-enggal budhal menyang mbahe Nisa.

            “Assalamualaikum, Kula nuwun..”

            “Kula nuwun...  Mbah..”

            “Assalamualaikuuuuum....!”

            Nganti ping telu anggonku uluk salam,  nanging durung ana sing semaur. Dasare pancen wis sepuh, manawa ra patya krungu. Hadeeehh..

            “Assalamualaikum,  Mbaaaahh.. kula putumu Mbahh..!”

            “Waalaikumsalam, mangga Nang, manggga, kene mlebu..”

Mbahe Nisa semaur sajake rada kaget, merga saka pawonan mburi karo mlayu-mlayu metu.

            “Piye, Nang? Ana apa ta, kog esuk-esuk dengaren wis tekan kene, sajak wigati temen.”

            “Piya-piye ndasmuii! (nanging cukup ana batin wae).  Wong wis cetha-cetha ngono esih takon piye. “hehehe, mbahe sehat nggih Mbah?”

            “Iya Nang, alhamdulillah sehat.. ya mung kagetan ngene, karang wis tuwa, kadhang sembahyang ya wis ra kuat ngadeg.”

            “Nggih Mbah, alhamdulillah menawi sehat, Lha Nisa ra inggih sampun budhal makarya Mbah? ” Ora two the point, aku ora langsung takon ngenai topik sing dakmaksud.

            “Iya iki mau dheweke rada kawanan, sewengi ora gelem turu, malah nangis wae, Nang-nang..”

            “Lohhh... lha wonten menapa?”

            “Anu iki mau...” durung tutug olehe ngendika mbahe wis mbrebes mili.. aku delok sajak ora karuwan batinku, melu trenyuh pisan.

            “Kados pundi, Mbah? Wonten menapa?” karo esih ethok-ethok ora ngerti.

             “Pangapuramu sing gedhe ya putuku, Cah Bagus.. mau bengi ana priyantun sing sowan mrene, duweni karep yaiku nglamar adhimu, Nisa, cah ayu. Mbah pancen wis janji karo awakmu, dene Nisa mbesuk kowe sing bakal ngrabi. Nanging wektu iki mbah sarwa ora kepenak, arep tak tulak, wong iku ya wis kasep cedhak rakete karo Mbah. Priyantun kala mau mojokake mbah, nganti ora bisa apa-apa, mung bisa nampa, kanthi rasa sing ora bisa legawa Nang..”

            Mbahe ngendika karo tetangisan, sansaya ora kuwat aku ngempet eluh sing tumiba,  batinku wis ambyar ra karuan, mung bisa semaur karo mesesegen.”

            “Kog saged makaten, menika kados pundi Mbah? Menapa mbah  boten ngendika yen si Nisa mpun kaliyan kula.”

            “Sepisan maneh pangapuramu singg gedhe Cah Bagus. Mbahe ki wis tuwa, yen kudu ngenteni awakmu mbah ya mesakke marang adhimu.. Mengko iki sasi Sawal, adhimu bakal resmi dirabi karo Huda.. tak jaluk awakmu sing iklas, Nang.. najan wis kaya mangkene Nisa kudu mbok lalikke, iya lalikke alon-alon..”

            Krungu tembung iki, aku sajak dadi mikir. Masa ya mbahe ngece aku mangkene.. utawa panjenengane wis krasa. Aku ra mangsuli apa-apa, mung bisa nangis wae. Mangka aku enggal-enggal pamit.

            “Mbah, kula pamit riyin Mbah..”

            Mbahe ya ora wangsulan, esih wae nangis, ngrumangsani yen panjengane luput.

            Bener kandhane, tanggal 14 sasi Sawal Nisa sida dirabi karo Huda, aku ya mung bisa teka nyang undangane wong sing banget tak kasihi, ta tresnani, nyawang kekarone lunggguh jejer, batinku ajurrr! Najan tak sawang Nisa ora bisa bungah kaya pengantin adhate.

            Let sedina sawise Nisa lan Huda resmi dadi bojo sing sah, aku entuk kabar,  dene mbahe Nisa seda..

            Manawa iki sing dikarepake mbahe kala wingi, yen ngenteni aku lulus, kabeh bakal rekasa.  Wong wadon sing ayu budine, uga sarirane, sing ditinggal seda ibune wiwit lair, sing ditinggal bapakne, ora duwe sapa-sapa maneh kejaba mbahe. Lumrah wae yen mbahe nampa lamaran wong lanang liya. Najan ta kaya mangkene.. atiku ra karuan, aku coba nglalikake Nisa, kabeh kontak sing berhubungan karo dheweke tak blokir. Nanging arepa kaya ngapa pancen aku ora bisa lali.. persis sing ana tembang kae. Lali lali datan bisa lali, lawas saya katon, upamakna wit-witan kang gedhe..

            Najan ta wis duwe dalan dhewe-dhewe, Nisa lan aku, nanging tresnaku ora bisa ilang, malah kepara sansaya mundhak olehku nresnani dheweke kaanthi meneng-meneng, nganti saiki ,nganti seprene, nganti aku nulis crita iki.

Nuwun.